सुर्खेत । सल्यानमा शनिबार बिहान भएको बोलेरो जिप दुर्घटनामा मृत्यु हुनेको संख्या तीन पुगेको छ । गम्भीर घाइते डिल्लीबहादुर वलीको उपचारका क्रममा मृत्यु भएपछि मृत्यु हुनेको संख्या तीन पुगेको हो ।
जिल्ला प्रहरी कार्यालय सल्यानका सूचना अधिकारी देवराज भट्टराईका अनुसार त्रिवेणी गाउँपालिका ५ सिम्खबाट लुहाम हुँदै तुलसीपुर जाँदै गरेको लु प्र ०२००१ ज ०००५ नम्बरको बोलेरो जिप सिम्खमा दुर्घटना हुँदा ६ जना गम्भीर घाइते भएका थिए ।
गम्भीर घाइते भएका त्रिवेणी गाउँपालिका ६ पोखरी बस्ने वर्ष ८ का रेशम बुढाथोकी र वर्ष १८ की विपना वुढाथोकीको जिल्ला अस्पताल सल्यानमा उपचारका क्रममा मृत्यु भएको थियो भने वर्ष ५० का डिल्लीबहादुर वलीको दाङको राप्ती स्वास्थ्य विज्ञान प्रतिष्ठानमा उपचारका क्रममा मृत्यु भएको हो ।
दुर्घटनामा परेर गम्भीर घाइते भएका सिम्खका वर्ष २९ का तारक भनेर चिनिने पारस बोहरा, गाडी चालक २४ वर्षका भूपाल पुन र ४२ वर्षकी लालमति बुढाथोकीको दाङको राप्ती स्वास्थ्य विज्ञान प्रतिष्ठानमा उपचार भइरहेको उनको भनाइ छ । जिप अनियन्त्रित भएर दुर्घटनामा परेको उनले जानकारी दिए । उनका अनुसार जिप सडकदेखि २ सय मिटर तल खसेको थियो । जिपमा चालकसहित ६ जना सवार थिए ।
प्रतिक्रिया दिनुहोस्