सुर्खेत। कर्णाली प्रदेश सरकारले उद्योग, पर्यटन, वन तथा वातावरणमन्त्री कल्याणी खड्कालाई सरकारको आधिकारिक प्रवक्ताको जिम्मेवारी सुम्पिएको छ। मन्त्रिपरिषद्को पछिल्लो निर्णयअनुसार अबदेखि प्रदेश सरकारका नीति, निर्णयहरू तथा समसामयिक विषयमा आधिकारिक धारणा सार्वजनिक गर्ने जिम्मेवारी मन्त्री खड्काले सम्हाल्ने छिन्। प्रदेश सरकारका काम-कारबाही, मन्त्रिपरिषद् बैठकका फैसलाहरू र प्रशासनिक तथा विकास निर्माणका सूचनाहरूलाई पारदर्शी र व्यवस्थित रूपमा सञ्चारमाध्यम तथा आम नागरिकसमक्ष पुर्याउन उहाँलाई प्रवक्ताको जिम्मेवारी दिइएको हो।
मन्त्री खड्का कर्णाली प्रदेशसभामा समानुपातिक निर्वाचन प्रणालीमार्फत निर्वाचित सांसद हुन्। तत्कालीन नेपाल कम्युनिस्ट पार्टी (एकीकृत समाजवादी) बाट प्रदेशसभा सदस्य बनेकी खड्का हालैको राजनीतिक समीकरण र दलहरूबीचको एकता/पुनर्गठनपछि नेपाली कम्युनिस्ट पार्टी (नेकपा) मा आबद्ध छिन्।
प्रदेश सरकारका निर्णयहरू सार्वजनिक गर्ने क्रममा सूचनाको एकरूपता र सहज पहुँच कायम गर्न प्रवक्ताको भूमिका महत्त्वपूर्ण मानिन्छ। मन्त्री खड्कालाई प्रवक्ताको जिम्मेवारी तोकिएसँगै सरकार र सञ्चारमाध्यमबीचको समन्वय थप प्रभावकारी हुने र प्रदेश सरकारका नीति तथा योजनाहरूबारे नागरिकलाई सही र आधिकारिक सूचना प्राप्त गर्न सहज हुने अपेक्षा गरिएको छ।
प्रतिक्रिया दिनुहोस्