सडक निर्माण गर्दा जेसीबी दुर्घटनामा चालकको मृत्यु

सुर्खेत। सुर्खेतको बराहताल गाउँपालिका–७ स्थित नयाँवनको भित्री सडकखण्डमा सडक निर्माणका क्रममा जेसीबी दुर्घटना हुँदा चालकको मृत्यु भएको छ। बाटो सफा गर्ने क्रममा भे १ ग १२७ नम्बरको जेसीबी अचानक अनियन्त्रित भई सडकबाट करिब ३०० मिटर तल भिरमा खसेको हो।

दुर्घटनामा परी बराहताल गाउँपालिका–५ निवासी ३३ वर्षीय चालक रामप्रसाद लामिछाने गम्भीर घाइते भएका थिए। घटनालगत्तै स्थानीय र प्रहरीको सहयोगमा उद्धार गरी उनलाई उपचारका लागि वीरेन्द्रनगरस्थित कर्णाली प्रदेश अस्पताल कालागाउँ पुर्‍याइएको थियो। तर, अस्पताल पुर्‍याउनासाथ परीक्षणपछि चिकित्सकहरूले उनलाई मृत घोषणा गरेका थिए। घटना हुनुको मुख्य कारण र अन्य प्राविधिक विषयबारे प्रहरीले आवश्यक अनुसन्धान अगाडि बढाएको जनाएको छ।