सिम्ता पूर्ण खोप सुनिश्चितता घोषणा

सुर्खेत। सुर्खेतकाे सिम्ता गाउँपालिका स्वास्थ्य क्षेत्रमा एउटा ठूलो फड्को मार्दै औपचारिक रूपमा ‘पूर्ण खोप सुनिश्चितता तथा दिगोपनायुक्त पालिका’ घोषित भएको छ। ‘स्थानीय स्रोतको उपयोग, स्वामित्व र सहभागिता, पूर्ण खोप सुनिश्चितता हाम्रो प्रतिबद्धता’ भन्ने मूल राष्ट्रिय नाराका साथ आयोजित एक विशेष भव्य समारोहबीच गाउँपालिकालाई यो ऐतिहासिक मान्यता प्रदान गरिएको हो। गाउँपालिकाभित्र रहेका ५ वर्षमुनिका सबै बालबालिकाहरूले राष्ट्रिय नियमित खोप कार्यक्रम अन्तर्गत पाउनुपर्ने सम्पूर्ण आधारभूत खोप समयमै प्राप्त गरेको वैज्ञानिक प्रमाणीकरण र सुनिश्चितता भएपछि गाउँपालिकाले यो महत्त्वपूर्ण उपलब्धि हासिल गरेको हो। यसअघि सिम्ताका सबै ९ वटै वडाहरूलाई सघन अनुगमन र प्रमाणीकरणका आधारमा ‘पूर्ण खोप सुनिश्चित वडा’ घोषणा गरिसकिएपछि मात्रै सिङ्गो गाउँपालिकालाई औपचारिक रूपमा पूर्ण खोप सुनिश्चितता तथा दिगोपनायुक्त पालिका घोषणा गर्ने तहमा पुर्‍याइएको हो।

​उक्त विशेष समारोहमा जिल्ला खोप समन्वय समितिका कार्यवाहक अध्यक्ष एवं नेपाल पत्रकार महासङ्घ सुर्खेतका अध्यक्ष मधुवन विसीले सिम्ता गाउँपालिकाका अध्यक्ष ऐनबहादुर चन्दलाई पूर्ण खोप सुनिश्चितता तथा दिगोपनाको आधिकारिक प्रमाणपत्र हस्तान्तरण गरेका थिए। सो अवसरमा बोल्दै प्रमुख अतिथि विसीले विकट भौगोलिक बनावट, स्वास्थ्य सेवाको सीमित पहुँच र जनचेतनाको कमी जस्ता अनेकौँ चुनौतीहरूका बाबजुद सिम्ताले हासिल गरेको यो स्वास्थ्य सूचकाङ्कको सफलता सिङ्गो सुर्खेत जिल्लाकै लागि गौरवको विषय भएको बताए। उनले यो गौरवशाली सफलताको असली जस अहोरात्र खटिने स्थानीय स्वास्थ्यकर्मी, भुइँतहका महिला स्वास्थ्य स्वयंसेविका, जनप्रतिनिधि तथा सचेत अभिभावकहरूको साझा सङ्घर्ष र प्रयासलाई जाने उल्लेख गर्दै यो अवस्थालाई आगामी दिनमा पनि दिगो रूपमा कायम राख्न सबै पक्ष उत्तिकै सक्रिय हुनुपर्नेमा जोड दिए। राज्यले स्वास्थ्य क्षेत्रमा जनशक्ति थप्दै लगे पनि केही सूचकाङ्कमा अझै अपेक्षित सुधार हुन नसकेको तर्फ सङ्केत गर्दै उनले स्थानीय तह र स्वास्थ्य संस्थाहरू अझ बढी जिम्मेवार बन्नुपर्ने आवश्यकता औँल्याए।

​यसैगरी, जनस्वास्थ्य सेवा कार्यालय सुर्खेतका खोप फोकल पर्सन घनबहादुर बुढाले सिम्ताले पूर्ण खोप सुनिश्चितता प्राप्त गरेसँगै यहाँका बालबालिकाको स्वास्थ्य सुरक्षाको जग अझ बलियो भएको धारणा राखे। उनले हालसम्म सुर्खेतका ९ मध्ये ७ वटा स्थानीय तहहरू पूर्णखोप सुनिश्चितता तथा दिगोपनायुक्त घोषणा भइसकेको जानकारी दिँदै बाँकी रहेका पालिकाहरू पनि आवश्यक मापदण्ड पूरा गर्ने अन्तिम चरणमा पुगेकाले चाँडै नै सिङ्गो सुर्खेत जिल्लालाई नै ‘पूर्ण खोप सुनिश्चितता तथा दिगोपनायुक्त जिल्ला’ घोषणा गर्ने बृहत् तयारी भइरहेको सुखद खबर सुनाए। राष्ट्रिय नियमित खोप कार्यक्रम अन्तर्गत जन्मेदेखि १५ महिनासम्मका बालबालिकाहरूले पाउनुपर्ने क्षयरोग विरुद्धको बीसीजी, पोलियो विरुद्धको ओपीभी र आईपीभी, निमोनिया विरुद्धको पीसीभी, रोटाभाइरस, दादुरा–रुबेला तथा जापानी इन्सेफलाइटिस लगायतका सबै प्राणरक्षक खोपहरू पाएको सुनिश्चित भएपछि मात्र यो घोषणा सम्भव भएको हो।

​घोषणा सभामा गाउँपालिका अध्यक्ष ऐनबहादुर चन्दले यो सफलता गाउँपालिकाका सम्पूर्ण नागरिक, अहोरात्र खटिने स्वास्थ्यकर्मी र महिला स्वास्थ्य स्वयंसेविकाहरूको साझा मेहनतको प्रतिफल भएको बताए। उनले पालिकाको विकट भूगोलमा रहेका कुनै पनि बालबालिका खोप पाउनबाट नछुटून् भन्ने उद्देश्यका साथ स्वास्थ्यकर्मीहरू गाउँ–गाउँ र कुना-काप्चाका घर–घरमा पुगेर सेवा प्रवाह गरेको स्मरण गर्दै आगामी दिनमा पनि खोप कार्यक्रमलाई अझ प्रभावकारी र गुणस्तरीय बनाउने प्रतिबद्धता जनाए। गाउँपालिका उपाध्यक्ष गोमा शर्मा रेग्मीले स्वस्थ बालबालिका नै भोलिको स्वस्थ समाज र समृद्ध राष्ट्रको बलियो आधार भएको बताउँदै प्रत्येक अभिभावकले आफ्ना बालबालिकालाई तोकिएको उमेर र समयमा अनिवार्य रूपमा स्वास्थ्य संस्थामा लगेर खोप लगाउनुपर्नेमा जोड दिइन्। वि.सं. २०३५ सालदेखि नियमित खोप कार्यक्रम सुरु भएको सुर्खेत जिल्लाको सिम्तामा आयोजित यस ऐतिहासिक उत्सवमा ९ वटै वडाका वडाध्यक्षहरू, स्वास्थ्य संस्थाका प्रमुखहरू, महिला स्वास्थ्य स्वयंसेविकाहरू र स्थानीय सरोकारवालाहरूको ठूलो र उत्साहजनक उपस्थिति रहेको थियो।