सुर्खेत । कर्णाली प्रदेशको सामाजिक विकास मन्त्रालयको ‘अपाङ्गता रोकथाम तथा पुनःस्थापना कार्यक्रम’ अन्तर्गत सुर्खेतको चौकुने गाउँपालिकाका अपाङ्गता भएका नागरिकहरूलाई सहायक/सहायता सामग्री वितरण गरिएको छ।
मन्त्रालयले साझेदारी कार्यक्रम सञ्चालनका लागि स्थानीय तहहरूबाट प्रस्ताव आह्वान गरेकोमा सोही प्रस्तावका आधारमा उत्कृष्ट छनोट भई चौकुने गाउँपालिकामा यो कार्यक्रम लागू गरिएको हो।
गाउँपालिकामा आयोजित एक विशेष समारोहका बिच सामाजिक विकास मन्त्री घनश्याम भण्डारीले अपाङ्गता भएका नागरिकहरूलाई आवश्यक सहायता सामग्रीहरू हस्तान्तरण गरेका हुन्।
सामग्री हस्तान्तरण कार्यक्रमलाई सम्बोधन गर्दै मन्त्री घनश्याम भण्डारीले अपाङ्गता भएका नागरिकहरूको हक-अधिकार र सहायताका लागि राज्य सधैँ साथमा छ भन्ने कुराको प्रत्यक्ष अनुभूति हुने गरी प्रदेश सरकारले योजनाबद्ध रूपमा काम गरिरहेको बताए।
”मानवीय जीवनमा कुन बेला कसलाई अपाङ्गता हुन्छ भन्ने कुरा कसैलाई निश्चित हुँदैन,” मन्त्री भण्डारीले भने, “त्यसैले अपाङ्गता भएका नागरिकहरूको सवालमा समाज र राज्यका सबै निकाय उत्तिकै जिम्मेवार र संवेदनशील बन्नुपर्छ।”
प्रदेश सरकारले अपाङ्गता सम्बन्धी छुट्टै नीति समेत ल्याएर सोही बमोजिम रणनीतिक कार्यक्रमहरू कार्यान्वयन गरिरहेको मन्त्री भण्डारीले जानकारी दिए। आगामी दिनमा यी कार्यक्रमहरूलाई थप परिमार्जित र प्रभावकारी बनाउँदै लैजाने उनले प्रतिबद्धता जनाए।
अहिले सुर्खेतको पश्चिमी क्षेत्रमा पर्ने चौकुने गाउँपालिकाबाट सुरु भएको यो कार्यक्रमलाई भविष्यमा कर्णाली प्रदेशका सबै ७९ वटै स्थानीय तहसम्म विस्तार गर्ने मन्त्रालयको दीर्घकालीन योजना रहेको समेत मन्त्री भण्डारीले स्पष्ट पारे।
सामग्री पाएपछि स्थानीय अपाङ्गता भएका नागरिक तथा उनीहरूका परिवारले खुसी व्यक्त गर्दै स्थानीय सरकार र प्रदेश सरकारको यो समन्वयकारी कदमको प्रशंसा गरेका छन्।
प्रतिक्रिया दिनुहोस्