सुर्खेत । गुणस्तरीय शिक्षा र भरपर्दो स्वास्थ्य सेवा नपाएकै कारण कर्णालीका ग्रामीण क्षेत्रबाट बसाइँसराइ तीव्र रूपमा बढिरहेको र यसले गाउँका विद्यालयहरू विद्यार्थीविहीन बन्ने खतरा बढेको सरोकारवालाहरूले औँल्याएका छन्।
वीरेन्द्रनगरमा आयोजित ‘गुणस्तरीय सिकाइका लागि विद्यालय शिक्षा क्षेत्र योजना तथा बजेट निर्माणमा स्थानीय सरकारको क्षमता अभिवृद्धि कार्यक्रम’ (SESP) परियोजनाको प्रदेशस्तरीय सिकाइ आदान-प्रदान कार्यशालामा सहभागीहरूले यस्तो चिन्ता व्यक्त गरेका हुन्।
कार्यशालामा स्थानीय सरकारहरूले परम्परागत शैक्षिक योजना बदल्नुपर्ने र गाउँमै बस्ने वातावरण सिर्जना गर्ने खालका कार्यक्रम ल्याउनुपर्नेमा जोड दिइएको छ।
गाउँमै बस्ने वातावरण र स्वरोजगारमूलक शिक्षा
कार्यशालामा उठेका मुख्य विषय तथा सुझावहरू यस प्रकार छन्:
बसाइँसराइको चुनौती र सामाधान: शिक्षा र स्वास्थ्यका कारण गाउँबाट सहरतर्फ भइरहेको तीव्र बसाइँसराइले ग्रामीण विद्यालयहरूमा विद्यार्थीको चरम अभाव देखिन थालेको छ। यस्ता शैक्षिक परियोजनाहरूले अब ग्रामीण क्षेत्रमै टिकिरहने र गुणस्तरीय शिक्षा पाउने वातावरण निर्माण गर्न ढिलाइ गर्नु हुँदैन।
सीपयुक्त र उत्पादनमुखी ज्ञान: स्थानीय तहहरूले अब बजेट र योजना बनाउँदा केवल सैद्धान्तिक मात्र नभई स्थानीय उत्पादन र स्वरोजगारमूलक सीपयुक्त ज्ञान प्राप्त गर्ने किसिमको व्यावहारिक शैक्षिक योजना निर्माण गर्नुपर्छ।
विद्यालयलाई उत्पादन केन्द्र बनाउने अवधारणा: विद्यालयहरूलाई केवल कण्ठ गर्ने थलो मात्र नबनाई स्थानीय उत्पादन र अर्थतन्त्रसँग जोडेर ‘उत्पादन केन्द्र’ का रूपमा विकास गर्न सकिने ठुलो सम्भावना छ। स्थानीय सरकारले आगामी योजनाहरूमा यसतर्फ विशेष ध्यान दिन आवश्यक छ।
योजना निर्माणमा स्थानीय तहको क्षमता अभिवृद्धि
विद्यालय शिक्षा क्षेत्र योजना (SESP) ले स्थानीय सरकारहरूको बजेट तथा कार्यक्रम तर्जुमा गर्ने क्षमता बढाउन काम गरिरहेको छ।
कार्यशालाका सहभागीहरूले सिकेका अनुभव र असल अभ्यासहरूलाई स्थानीय तहको आगामी आर्थिक वर्षको नीति, कार्यक्रम र बजेटमा व्यावहारिक रूपमै उतार्न सके कर्णालीको शैक्षिक गुणस्तर र स्थानीय रोजगारीमा ठुलो परिवर्तन आउने विश्वास व्यक्त गरेका छन्।
प्रतिक्रिया दिनुहोस्