८ वर्ष कैद सजाय सुनाइएका फरार प्रतिवादी सुर्खेतमा पक्राउ

​सुर्खेत | जबरजस्ती करणी मुद्दामा दोषी ठहर भई लामो समयदेखि फरार रहेका एक व्यक्तिलाई सुर्खेत प्रहरीले पक्राउ गरेको छ। जिल्ला अदालत सुर्खेतबाट ८ वर्षको कैद सजाय तोकिएका लेकबेसी नगरपालिका–९ का २८ वर्षीय अर्जुन सुनार पक्राउ परेका हुन्।

​जिल्ला प्रहरी कार्यालय सुर्खेतका अनुसार सुनार अदालतको फैसलापछि सजाय भुक्तान नगरी लुकीछिपी बस्दै आएका थिए। प्रहरीले प्राप्त गरेको विशेष सूचनाका आधारमा उनलाई बुधबार बिहान लुकिरहेकै अवस्थामा नियन्त्रणमा लिइएको हो।

​पक्राउ परेका सुनारलाई फैसला कार्यान्वयनका लागि बुधबार नै जिल्ला अदालत सुर्खेतमा पेस गरिएको प्रहरीले जनाएको छ। फरार अपराधीहरूको खोजी र कानुनी कठघरामा उभ्याउने प्रहरीको पछिल्लो सक्रियता अन्तर्गत यो पक्राउलाई महत्वपूर्ण मानिएको छ।