कालिकोटका एक युवक बेपत्ता, उद्धारमा कठिनाइ

सुर्खेत| कर्णाली करिडोर सडकखण्डअन्तर्गत बाजुरा र कालिकोटको सिमानामा पर्ने लौखूडाँडामा आइतबार बिहान स्काभेटर दुर्घटना हुँदा एक युवक बेपत्ता भएका छन्। नयाँ सडक निर्माणका क्रममा थुप्रिएको माटो पन्छाउन जाँदै गरेको स्काभेटर सडकबाट करिब २ सय मिटर तल भीरमा खसेको हो।

​दुर्घटनामा कालिकोटको नरहरिनाथ गाउँपालिका–२ का १८ वर्षीय महेश रावल बेपत्ता भएका हुन्। जिल्ला प्रहरी कार्यालय बाजुराका अनुसार प्रदेश ३–०१–००३ क ६३११ नम्बरको उक्त स्काभेटरमा चालक र सहचालकसहित तीन जना सवार थिए। दुर्घटनामा चालक २५ वर्षीय केशव विष्ट र सहचालक भने सकुशल रहन सफल भएका छन्।

​नयाँ निर्माण भइरहेको लौखु जिरो पोइन्ट–कोल्टी सडकबाट खसेको माटोले कर्णाली करिडोर अवरुद्ध भएपछि त्यसलाई खुलाउन जाने क्रममा यो दुर्घटना भएको हो। बेपत्ता रावलको खोजीका लागि नेपाल प्रहरी र नेपाली सेनाको टोली तत्काल घटनास्थलमा खटिएको छ।

​जिल्ला प्रहरी कार्यालय बाजुराका प्रमुख प्रहरी नायब उपरीक्षक इकवाल हवारीका अनुसार दुर्घटना भएको भीर अत्यन्तै कठिन र जोखिमपूर्ण भएकाले बेपत्ताको खोजी एवं उद्धार कार्यमा निकै समस्या भइरहेको छ। भौगोलिक विकटताका बाबजुद सुरक्षा निकायले खोजी कार्यलाई निरन्तरता दिइरहेका छन्।