सुर्खेत। कर्णाली प्रदेशको उद्योग, पर्यटन, वन तथा वातावरण मन्त्रालयले प्रदेशको पर्यटन क्षेत्रलाई नयाँ उचाइमा पुर्याउन १० बर्से रणनीतिक गुरुयोजना सार्वजनिक गरेको छ। अबको दशक कर्णालीको पर्यटनका लागि ‘स्वर्ण युग’ बनाउने लक्ष्यका साथ सरकारले पूर्वाधार विकास र गन्तव्य पहिचानलाई तीव्रता दिएको छ। पर्यटकको सहजताका लागि ‘गन्तव्य कर्णाली’ मोबाइल एप समेत सञ्चालनमा ल्याइएको छ, जसले होटेल, पदमार्ग, दस्तुर र दूरीको आधिकारिक सूचना प्रदान गर्नेछ। यसले कर्णाली घुम्न आउने पाहुनाहरूका लागि एउटा भरपर्दो ‘डिजिटल गाइड’को काम गर्ने मन्त्रालयका सचिव अजितकुमार कर्णको विश्वास छ।
महत्त्वाकाङ्क्षी लक्ष्य र बसाइ लम्बाउने योजना
प्रदेश सरकारले सन् २०३० सम्ममा वार्षिक १५ लाख आन्तरिक र २ लाख वैदेशिक पर्यटक भित्र्याउने लक्ष्य राखेको छ। हाल पर्यटकहरू औसतमा चार दिन मात्र कर्णालीमा रहने गरेकोमा, त्यसलाई बढाएर १० देखि २१ दिनसम्म पुर्याउने रणनीतिक योजना बनाइएको छ। पर्यटकलाई लामो समयसम्म अड्याउन हवाई सम्पर्कलाई सुर्खेतबाट सिधै हिमाली जिल्लाहरूमा जोड्ने तयारी भइरहेको छ, जसका लागि नागरिक उड्डयन प्राधिकरणसँग समन्वय भइरहेको छ। तर, पूर्वाधार मात्र पर्याप्त छैन; कर्णाली उत्सवमा उठेको ‘आतिथ्यको कमी’ ले गर्दा ८० प्रतिशत पर्यटक दोस्रो पटक नफर्कने तितो यथार्थलाई बदल्नु नै अबको मुख्य चुनौती देखिएको छ।
करोडौँको लगानी र गौरवका आयोजना
पर्यटन प्रवर्द्धनका लागि चालु आर्थिक वर्षमा मात्रै ४३ करोड रुपैयाँ बजेट विनियोजन गरिएको छ। मन्त्रालयका सूचना अधिकारी महेश नेपालीका अनुसार मुगुको रारा, सुर्खेतको काँक्रेविहार र बुलबुले, तथा रुकुम पश्चिमको स्यार्पुताल जस्ता प्रमुख गन्तव्यको संरक्षण र विकासका लागि बहुवर्षीय योजनाहरू स्वीकृत भएका छन्। यति मात्र होइन, डोल्पाको से–फोक्सुण्डो किनारमा रहेको ‘रिङ्ग्मो बस्ती’लाई एकीकृत पर्यटकीय बस्तीका रूपमा विकास गर्न सङ्घ र प्रदेश सरकारले लगानी सुरु गरिसकेका छन्।
मानसरोवर प्रवेशद्वारदेखि रोजगारीसम्म
हुम्लाको सिमकोट र खार्पुनाथको सिमानामा मानसरोवर प्रवेशद्वारको नमुना एकीकृत पूर्वाधार निर्माणका लागि ३४ करोड ५० लाख रुपैयाँ विनियोजन गरिएको छ। यो आयोजनाले धार्मिक पर्यटकहरूलाई आकर्षित गर्ने लक्ष्य राखेको छ। पर्यटनलाई केवल भ्रमणमा मात्र सीमित नराखी रोजगारीसँग जोड्न महिला आयआर्जन, जडीबुटी निकासी र स्थानीय उत्पादनको बजारीकरणलाई पनि उत्तिकै प्राथमिकता दिइएको छ। कर्णालीको यो १० बर्से दौड सफल भएमा यहाँको प्राकृतिक सौन्दर्यले मात्र होइन, आर्थिक समृद्धिले पनि संसारको ध्यान खिच्ने निश्चित छ।
प्रतिक्रिया दिनुहोस्