सुर्खेत । भूमि व्यवस्था, कृषि तथा सहकारी मन्त्रालय कर्णाली प्रदेशका सचिव सञ्जिवकुमार कर्णले खाद्य सुरक्षा र गुणस्तरका हिसाबले कर्णाली प्रदेश अन्य सात प्रदेशको तुलनामा सुरक्षित रहेको बताउनुभएको छ। खाद्य प्रविधि तथा गुण नियन्त्रण कार्यालय सुर्खेतद्वारा सोमबार वीरेन्द्रनगरमा आयोजित ‘खाद्य स्वच्छता तथा गुणस्तरसम्बन्धी अभिमुखीकरण’ कार्यक्रमलाई सम्बोधन गर्दै सचिव कर्णले यहाँको माटो र उत्पादनमा प्राकृतिक शुद्धता रहेको उल्लेख गर्नुभयो। “हाम्रो शरीरलाई आवश्यक पर्ने पौष्टिक तत्वहरू यहाँकै रैथाने बालीमा प्रशस्त पाइन्छन्,” उहाँले भन्नुभयो, “त्यसैले कर्णाली सरकारले रासायनिक विषादीको प्रयोगलाई निरुत्साहित गर्दै अर्गानिक उत्पादनको अभियानलाई प्राथमिकतामा राखेको छ।”
स्वच्छताका लागि त्रिपक्षीय जिम्मेवारी: उत्पादन, उपभोग र प्रशासन
कार्यक्रममा खाद्य प्रविधि तथा गुण नियन्त्रण कार्यालय सुर्खेतका निमित्त प्रमुख सन्तोष दाहालले सुरक्षित खाद्य प्रणालीका लागि ‘उत्पादकको इमानदारी, उपभोक्ताको विवेक र प्रशासनको जिम्मेवारी’ अनिवार्य हुने तर्क गर्नुभयो। खानपानजन्य त्रुटीका कारण मानव स्वास्थ्यमा गम्भीर जोखिम बढ्दै गएको सन्दर्भमा उहाँले गुणस्तरयुक्त खानाको महत्त्वमाथि प्रकाश पार्नुभयो। आधुनिक जीवनशैलीका कारण मानिसहरू सर्नेभन्दा नसर्ने (जीर्ण) रोगबाट ग्रसित भइरहेको अवस्थामा ‘आलीदेखि थालीसम्म’ अर्थात् उत्पादनदेखि भान्छासम्मकै प्रक्रिया स्वच्छ र सुरक्षित हुनुपर्नेमा विज्ञहरूको जोड थियो।
सचेतना र भ्रम निवारणको खाँचो
अभिमुखीकरणका सहभागीहरूले नागरिकको सोच र स्वादमा रहेको भ्रमका कारण बजारमा पाइने अस्वस्थकर वस्तुको उपभोग बढिरहेको प्रति चिन्ता व्यक्त गरे। बजार अनुगमन र निरीक्षणमा संलग्न पदाधिकारी एवं कर्मचारीहरूलाई लक्षित गरी आयोजना गरिएको उक्त कार्यक्रममा सहभागीहरूले उपभोक्ता सचेतनालाई तल्लो तहसम्म पुर्याउनुपर्ने सुझाव दिएका छन्। नागरिकको दृष्टि र स्वादमा रहेको दोषलाई चिर्नका लागि निरन्तरको अनुगमनसँगै शिक्षा र सञ्चारका माध्यमबाट स्वच्छ खाद्य उपभोगको सन्देश प्रवाह गर्नुपर्ने निष्कर्ष कार्यक्रमले निकालेको छ।
प्रतिक्रिया दिनुहोस्