‘भयरहित वातावरण बनाउन’ कडा निर्देशन

सुर्खेत। आगामी फागुन २१ गते हुने प्रतिनिधिसभा निर्वाचनको सुरक्षा तयारी बुझ्न नेपाली सेनाका प्रधानसेनापति अशोकराज सिग्देल सुर्खेत आइपुगेका छन्। निर्वाचन नजिकिँदै गर्दा कर्णालीको सुरक्षा अवस्था र सेनाको परिचालनबारे बुझ्न उनी उत्तरपश्चिम पृतना हेडक्वाटर ओर्लिएका हुन्।

बिहीबार सुर्खेत पुगेका प्रधानसेनापति सिग्देलले कर्णाली प्रदेशका प्रमुख सचिव वीरेन्द्रकुमार यादव र ‘प्रदेश निर्वाचन कमाण्ड सेल’ का पदाधिकारीहरूसँग उच्चस्तरीय छलफल गरे। सो क्रममा उनले कर्णालीका १० वटै जिल्लाको सुरक्षा संवेदनशीलता र निर्वाचनका चुनौतीबारे जानकारी लिएका थिए। प्रधानसेनापतिले निर्वाचनलाई स्वतन्त्र, निष्पक्ष र भयरहित वातावरणमा सम्पन्न गराउन कुनै कसर बाँकी नराख्न निर्देशन दिएका छन्। उनले सुरक्षाकर्मीहरूलाई उच्च सतर्कता अपनाउन र प्रभावकारी सुरक्षा संयन्त्र सुनिश्चित गर्न समेत सचेत गराएका छन्।

छलफलका क्रममा उत्तरपश्चिम पृतनाका पृतनापति दिपेशजंग शाहले निर्वाचनको सुरक्षा योजनाबारे विस्तृत जानकारी गराएका थिए। उनले कर्णालीका विकट र संवेदनशील क्षेत्रमा जनशक्ति परिचालन, उपलब्ध स्रोतसाधनको व्यवस्थापन र हवाई गस्तीसम्बन्धी योजनाबारे प्रधानसेनापतिलाई ब्रिफिङ गरेका थिए। सेनाले कर्णालीका विमानस्थल, कारागार र अति संवेदनशील मतदान स्थलहरूको सुरक्षा जिम्मा लिइसकेको सन्दर्भमा प्रधानसेनापतिको यो भ्रमणलाई निकै अर्थपूर्ण रूपमा हेरिएको छ।