सुर्खेत । आसन्न निर्वाचनका लागि तिम्रो कर्णाली प्रदेशमा अब मतपत्र पुग्ने तयारी अन्तिम चरणमा पुगेको छ। निर्वाचन आयोगका सचिव कृष्णबहादुर राउतले दिएको जानकारी अनुसार फागुन ९, १० र ११ गतेभित्र हुम्ला, मुगु र डोल्पा जस्ता उच्च हिमाली जिल्लामा मतपत्र पठाइसकिनेछ। राउतले कर्णाली प्रदेशका अन्य जिल्लामा पनि छिट्टै मतपत्र पठाउने बताएका छन् ।
प्रदेश निर्वाचन सुरक्षा समितिको जिल्ला प्रशासन कार्यालय सुर्खेत वीरेन्द्रनगरमा बसेको बैठकमा सचिव राउतले विशिष्ट अवस्थामा हुन लागेको निर्वाचन सम्पन्न गर्न निर्वाचन आयोगले कुनै कसर बाँकी बताए । उनले भने “निर्वाचन सामग्रीसहित मतदान केन्द्रमा खटिने यहाँका कर्मचारीको भत्ता, ढुवानी र हेलिकप्टरको खर्च पठाइ सकिएको छ । आवश्यकतामा आयोगले थप काम गर्दै जानेछ ।”
फागुन १० गतेदेखि मसान्तसम्मको मौसम अनुमान गरेर पठाउन जल तथा मौसम विज्ञान विभागलाई अनुरोध गरिएको बताउँदै उनले यहाँका उच्च हिमाली जिल्लाको निर्वाचनका लागि हुम्ला, मुगु र डोल्पामा फागुन ९, १० र ११ गतेभित्र मतपत्र पठाउने तयारी भइरहेको बताए । तीन हजार मिटरभन्दा माथि जिल्लामा लेक लाग्ने अवस्थालाई मध्य नजर गरेर औषधि खरिदका लागि सम्बन्धित जिल्ला निर्वाचन कार्यालयमा बजेट पठाइएको सचिव राउतको भनाइ थियो ।
कर्णाली प्रदेशका हिमाली जिल्लामा निर्वाचन पूर्व र निर्वाचन पश्चात् मतदान केन्द्रमा खटाइने कर्मचारीको आउने जाने व्यवस्थाको सुनिश्चित गर्न बैठकमा सुरक्षा प्रमुखहरूले अनुरोध गरेका थिए । त्यसैगरी निर्वाचनमा खटिएका कर्मचारीलाई आफ्नो मताधिकार प्रयोग गर्ने अवसर आयोगले दिनुपर्नेमा जोड दिइएको थियो । बैठकमा प्रदेश कमान्ड पोष्टका संयोजक कर्णाली प्रदेश सरकारका निमित्त सचिव लक्ष्मीकुमार विक, जिल्ला कमान्ड पोष्टका अध्यक्ष सुर्खेत जिल्लाका प्रमुख जिल्ला अधिकारी जगदिश्वर उपाध्यायले निर्वाचन तयारीको अवस्था, सुरक्षाका चुनौती र समस्याका बारेमा प्रस्तुति राखेका थियो ।
प्रतिक्रिया दिनुहोस्