याे चुनावमा एमाले र काँग्रेसकाे मात्रै प्रतिस्पर्धा हुन्छ 

सुर्खेत । नेपाली राजनीतिको मियो मानिने नेकपा एमाले र नेपाली कांग्रेसबीचको स्वस्थ प्रतिस्पर्धा नै मुलुकको वर्तमान संकटको अचुक औषधि हुनसक्ने तर्क एमाले सचिव यामलाल कँडेलले अघि सारेका छन्। सोमबार सुर्खेतको वीरेन्द्रनगर–१२ मा आयोजित चुनावी कोणसभालाई सम्बोधन गर्दै उनले स्थापित दलहरूको जगमा मात्रै समृद्धिको महल ठड्याउन सकिने दाबी गरे।

पछिल्लो समय राजनीतिमा ‘नयाँ’ को आवरणमा देखिएको अस्थिरता र पपुलिजमतर्फ संकेत गर्दै कँडेलले मुलुकको मियो सम्हाल्ने सामर्थ्य केवल एमाले र कांग्रेससँग मात्र रहेको जिकिर गरे। आगामी फागुन २१ गतेका लागि तय भएको निर्वाचन केवल एउटा प्राविधिक प्रक्रिया मात्र नभई, देशलाई भू-राजनीतिक चक्रव्यूह र आन्तरिक अस्थिरताबाट जोगाउने एउटा विशेष मोड भएको उनको ठम्याइ छ।

अराजकताको मुखुण्डो र सहकारी प्रकरण

कँडेलको सम्बोधनमा तीखो प्रहार ती शक्तिहरूप्रति लक्षित थियो, जो परिवर्तनका नाममा ‘ध्वंस’ को राजनीति गरेर सत्ताको सोपान चढ्न चाहन्छन्। सिंहदरबार जलाउने धम्की दिने र सहकारीको बचत अपचलनमा मुछिएका पात्रहरूले अहिले ‘नयाँ’ को मुखुण्डो ओढेर जनतालाई भ्रमित पारिरहेको उनले आरोप लगाए। सामाजिक सञ्जालको सहारामा नकारात्मकताको खेती गरेर नागरिकमा राज्यप्रति नै वितृष्णा जगाउने खेल भइरहेकोप्रति उनले गम्भीर चिन्ता व्यक्त गरे।

वैचारिक कित्ता र सहकार्यको मर्म

एमाले र कांग्रेस फरक राजनीतिक कित्तामा उभिएका भए तापनि लोकतान्त्रिक प्रणालीको सुदृढीकरणका लागि यी दुई शक्तिबीचको प्रतिस्पर्धा नै स्वस्थ हुने कँडेलको विश्लेषण छ। “कांग्रेस एक्लैले निकास दिन सक्दैन र प्रचण्डको अस्थिर राजनीतिमाथि अब विश्वास गर्ने ठाउँ छैन,” उनले भने। हिजो व्यवस्था नै भत्काउन उक्साउनेहरूले आज देश बनाउने भाषा बोल्नु आफैँमा विरोधाभासपूर्ण रहेको उनको टिप्पणी थियो।

विकास र स्थायित्वको मार्गचित्र

स्थानीय र प्रदेश सरकारले गरेका सकारात्मक कामहरूलाई ओझेलमा पार्न नयाँ समूहहरूले अनावश्यक विरोधको खेती गरिरहेको कँडेलको बुझाइ छ। उनले कार्यकर्ताहरूलाई ‘नकारात्मकता’ को रक्षात्मक घेराबाट बाहिर निस्केर विकास र स्थायित्वका मुद्दामा केन्द्रित हुन निर्देशन दिए। निर्वाचन भनेको भोट खसाल्ने कार्य मात्र नभई, भरोसाको धरोहर जोगाउने अवसर भएको उनको सार थियो।