पुराना दललाइ नयाँकाे चुनौती

सुर्खेत | आगामी २१ फागुनका लागि तय भएको प्रतिनिधिसभा निर्वाचनको मिति नजिकिँदै जाँदा देशको राजनीति सुर्खेततर्फ सोझिएको छ। कर्णालीको राजधानी सुर्खेतका दुई निर्वाचन क्षेत्रमा यतिबेला चुनावी रन्को यति चुलिएको छ कि, बजारका चिया पसलदेखि गाउँका चौतारीसम्म राजनीतिक बहसले तताएका छन्। निर्वाचन आयोगले आफ्नो तयारीलाई अन्तिम रूप दिँदै गर्दा राजनीतिक दलहरू भने भोट तान्न घरदैलो र गाउँ केन्द्रित अभियानमा आक्रामक रूपमा होमिएका छन्।

सुर्खेतका दुईवटा सिटका लागि यसपटक ३० जना उम्मेदवारहरू चुनावी मैदानमा भाग्य अजमाउँदै छन्। परम्परागत रूपमा नेपाली कांग्रेस र नेकपा एमालेबीचको ‘हेभीवेट’ भिडन्त हुने गरेको यस क्षेत्रमा यसपटकको समीकरण भने अलि फेरिएको छ। राष्ट्रिय स्वतन्त्र पार्टी (रास्वपा) मा देखिएको जनलहर, राप्रपाको सक्रियता र ‘जेन–जी’ आन्दोलनपछिको बदलिँदो चेतनाले पुराना दलहरूलाई निकै ठूलो चुनौती थपिदिएको छ।

सुर्खेत–१: दाजुको विरासत र भाइको अग्निपरीक्षा

सुर्खेत निर्वाचन क्षेत्र नं. १ मा यसपटक निकै रोचक मोड देखिएको छ। २०४८ सालदेखि झन्डै एकलौटी राज गर्दै आएका कांग्रेसका प्रभावशाली नेता पूर्णबहादुर खड्का यसपटक चुनावी मैदानमा छैनन्। पार्टीको आन्तरिक समीकरण र सर्वोच्चमा मुद्दा विचाराधीन रहेको कारण नैतिकता देखाउँदै उनी पछि हटेपछि कांग्रेसले उनका सहोदर भाइ विष्णुबहादुर खड्कालाई मैदानमा उतारेको छ। तर, विष्णुका लागि यो बाटो सहज छैन। उनलाई एमालेका ध्रुवकुमार शाहीले कडा टक्कर दिइरहेका छन्, जो २०७४ मा पूर्णबहादुरलाई नै पराजित गरेका अनुभवी खेलाडी हुन्। त्यस्तै, कांग्रेसकै पुराना नेता टेकबहादुर सिंहले रास्वपाबाट उम्मेदवारी दिएपछि कांग्रेसको भोट काटिने डरले यो क्षेत्रको नतिजा झन् अनिश्चित बनेको छ।

सुर्खेत–२: नयाँ र पुराना अनुहारबीचको रोचक भिडन्त

सुर्खेत क्षेत्र नं. २ मा पनि १७ जना उम्मेदवारहरू चुनावी मैदानमा छन्। यहाँ कांग्रेसका नारायण कोइराला र एमालेका कुलमणि देवकोटाबीच मुख्य प्रतिस्पर्धा हुने आकलन गरिएको छ। यद्यपि, रास्वपाका रमेश सापकोटा र राप्रपाका कविराम पुरीले युवा मतदाताहरूलाई आकर्षित गरिरहेका छन्। विकास, समृद्धि र सुशासनका नारा सबैका साझा भए पनि मतदाताहरू भने यसपटक आश्वासनभन्दा परिणाम खोजिरहेका छन्।

दलहरूका आफ्नै दाबी र एजेन्डा

चुनावी प्रचारमा नेपाली कांग्रेसले लोकतन्त्रको रक्षा र संघीयताको मजबुतीलाई आफ्नो मुख्य एजेन्डा बनाएको छ। “जनताको अधिकार संरक्षण र समावेशी विकास नै हाम्रो लक्ष्य हो,” कांग्रेसका उम्मेदवारहरू भनिरहेका छन्। उता, नेकपा एमाले भने स्थायित्व र सुशासनको नारासहित मैदानमा छ। आफ्नो कार्यकालमा भएका सडक, विद्युत् र खानेपानीका कामलाई उपलब्धिको रूपमा प्रस्तुत गर्दै एमालेले औद्योगिक विकासको सपना बाँडिरहेको छ। यस्तै, नेकपाले सामाजिक न्याय र परिवर्तनलाई जोड दिँदा रास्वपाले भने पुराना दलबाट देशको कायापलट सम्भव नभएको भन्दै वैकल्पिक शक्तिको रूपमा आफूलाई प्रस्तुत गरिरहेको छ।

मतदाताको मनमा के छ ?

चुनावी सभाहरूमा नेताहरूले भव्य भाषण गरे पनि भुइँतहका मतदातामा भने केही असन्तुष्टि कायमै छ। “हरेक चुनावमा विकासका कुरा धेरै सुनिन्छ, तर गाउँमा परिणाम कम देखिन्छ,” बराहतालका लक्ष्मण थापा भन्छन्, “हामीलाई अब भाषण गर्ने होइन, साँच्चै काम गर्ने र जनताप्रति उत्तरदायी हुने प्रतिनिधि चाहिएको छ।”

जिल्ला प्रशासन र सुरक्षा निकायले निर्वाचनलाई शान्तिपूर्ण र भयरहित बनाउन सुरक्षा व्यवस्था कडा पारेका छन्। फागुन २१ गते सुर्खेतका मतदाताले कसलाई सिंहदरबार पठाउनेछन्, त्यो त हेर्न बाँकी नै छ, तर अहिलेको माहौलले के संकेत गर्छ भने— यसपटकको निर्वाचन विगतको जस्तो पूर्वानुमान गर्न सकिने खालको छैन।