पुराना सारथि बाहिरिंदा नयाँ अनुहारबीच राेचक भिडन्त

सुर्खेत क्षेत्र नम्बर २ को संसदीय राजनीतिमा झन्डै तीन दशकपछि ठूलो फेरबदल आएको छ। २०५१ सालदेखि निरन्तर मुख्य प्रतिस्पर्धीका रूपमा रहँदै आएका कांग्रेसका हृदयराम थानी र एमालेका यामलाल कँडेल यसपटक प्रतिनिधिसभाको प्रत्यक्ष चुनावी मैदानमा नभएपछि यो क्षेत्रमा नयाँ उम्मेदवारहरूबीचको भिडन्त रोचक बन्ने देखिएको छ।

ऐतिहासिक विरासत र परिवर्तन विगतका निर्वाचनहरूमा थानी र कँडेलले पालैपालो जित–हार बेहोर्दै आएका थिए। तर, संघीयतापछि कँडेल प्रदेश राजनीति (हाल मुख्यमन्त्री) मा केन्द्रित भए भने २०७९ सम्म थानीले केन्द्रको राजनीति सम्हाले। यसपटक स्वास्थ्य प्रतिकूलताका कारण थानीले विश्राम लिएपछि कांग्रेसले उनको ‘कोर टिम’ का सदस्य एवं सुर्खेत उपत्यका विकास समितिका पूर्वअध्यक्ष नारायण कोइरालालाई मैदानमा उतारेको छ।

मैदानमा नयाँ सारथिहरू थानीको उत्तराधिकारीका रूपमा आएका कोइराला र एमालेका जिल्ला अध्यक्ष कुलमणि देवकोटाबीच मुख्य प्रतिस्पर्धा हुने आकलन गरिएको छ। देवकोटा सुर्खेत उपत्यका खानेपानी उपभोक्ता संस्थामा लामो समय नेतृत्व गरेको अनुभवसहित चुनावी मैदानमा छन्।

यस्तै, नेकपाका केन्द्रीय सदस्य एवं पूर्वमाओवादी कमान्डर झकबहादुर मल्ल (सुदीप) पनि बलियो प्रतिस्पर्धीका रूपमा देखिएका छन्। उता, नेपाली कांग्रेसको राजनीति छाडेर राष्ट्रिय स्वतन्त्र पार्टी (रास्वपा) बाट उम्मेदवार बनेका यातायात व्यवसायी रमेश सापकोटा र राप्रपाका जिल्ला अध्यक्ष कविराम पुरीले पनि चुनावी सरगर्मी बढाएका छन्। यस क्षेत्रमा कुल १७ जना उम्मेदवार प्रतिस्पर्धामा छन्।

चुनावी रणनीति र चुनौती वीरेन्द्रनगरका १४ वडासहित पश्चिम सुर्खेतका बराहताल, पञ्चपुरी र चौकुने समेटिएको यो क्षेत्रमा ७२ हजार मतदाता छन्।

• नेपाली कांग्रेस: आफ्नो बलियो संगठन, युवा अनुहार र थानीको विरासत जोगाउँदै जित निकाल्ने दाउमा छ।

• नेकपा एमाले: संगठन परिचालन र पार्टी नेतृत्वको सरकारले गरेका कामलाई चुनावी एजेन्डा बनाएर अघि बढेको छ।

• रास्वपा र अन्य: पुराना दलप्रतिको जनअसन्तुष्टि र सुशासनको मुद्दालाई मुख्य आधार बनाएका छन्।

पार्टीका स्थापित हेभिवेट नेताहरू मैदानमा नभएको अवस्थामा मतदाताले नयाँ अनुहार र नयाँ एजेन्डालाई कसरी लिने हुन् भन्ने कुराले सुर्खेत–२ को नतिजा तय गर्ने देखिन्छ।