दैलेखको नारायण ‘सामाजिक सुरक्षा भत्ता पहुँच सुनिश्चितता’ नगर घोषणा

दैलेख । नारायण नगरपालिकालाई सामाजिक सुरक्षा भत्ता वितरण कार्यक्रममा सबै योग्य लाभग्राहीको पूर्ण पहुँच सुनिश्चित भएको नगर घोषणा गरिएको छ।

जिल्ला समन्वय समितिको सभाहलमा सम्पन्न कार्यक्रममा सामाजिक विकास मन्त्री माननीय घनश्याम भण्डारीको प्रमुख आतिथ्यता रहेको थियो। नगरपालिकाले सामाजिक सुरक्षा भत्ता सबै पात्रसम्म सहज रूपमा पुगोस् भन्ने उद्देश्यसहित सञ्चालन गर्दै आएको प्रणालीगत सुधार, अभिलेख अद्यावधिक तथा सेवा वितरणको व्यवस्थापन प्रभावकारी बनेसँगै नगर घोषणा गरिएको हो।

कार्यक्रममा मन्त्री भण्डारीले सामाजिक सुरक्षासँग सम्बन्धित सेवामा कसै पनि वञ्चित नहोस् भन्ने उद्देश्यले सरकार स्थानीय तहसँग सहकार्य गर्दै अघि बढिरहेको बताए। उनले लाभग्राहीको पहिचान, डेटा व्यवस्थापन तथा नियमित अनुगमनलाई अझ सशक्त बनाउँदै सेवा प्रवाहलाई पारदर्शी र सहज बनाउने प्रतिबद्धता व्यक्त गरे।

घोषणा कार्यक्रममा स्थानीय जनप्रतिनिधि, कार्यालय प्रमुखहरू, सामाजिक सुरक्षा लाभग्राही तथा सरोकारवाला निकायहरूको उपस्थिति थियो।