दलित समुदायका विपन्न परिवारलाई बाख्रा वितरण

सुर्खेत । पश्चिम सुर्खेतको बराहताल गाउँपालिका–५ मा दलित समुदायका विपन्न परिवारलाई बाख्रा वितरण गरिएको छ । आर्थिक अवस्था कमजोर रहेका परिवारहरूको आयआर्जन बढाउनका लागि ४५ वटा बाख्रा र एक वटा खरी जातको बोका वितरण गरिएको हो । यो कार्यक्रमजैविक विविधता अनुसन्धान तथा विकासका लागि स्थानीय पहल (ली–बर्ड) ले सञ्चालन गर्दै आएको ग्रिन कर्णाली परियोजना अन्तर्गत अघि बढाइएको हो ।

कार्यक्रम अधिकृत प्रतिभा गैरेका अनुसार, प्रत्येक परिवारलाई लगभग २० हजार रुपैयाँ बराबरको दुईवटा बाख्रा दिइएको छ । बाख्रा मात्र वितरण नभई, परिवारहरूले राम्रोसँग पालन–पोषण गर्न सकून् भनेर बाख्रा पालन, हेरचाह, रोग नियन्त्रण र व्यवस्थापनसम्बन्धी तालिम पनि प्रदान गरिएको छ । यो तालिम बराहताल गाउँपालिकाको पशु सेवा शाखाको समन्वयमा सम्पन्न भएको हो ।

गत वर्ष पनि लक्षित समुदायलाई बाख्रा वितरण गरिएको थियो । यस वर्षको कार्यक्रमलाई अझ प्रभावकारी बनाउन गाउँपालिकासँग सहकार्य गरिएको छ। सोही सन्दर्भमा गाउँपालिकाका अध्यक्ष भीमबहादुर भण्डारीले भने,
“लक्षित समुदायको जीवनस्तर सुधार होस् भनेर यस वर्ष पनि आयआर्जनसँग जोडिएका विशेष कार्यक्रम राखेका छौँ । केही कार्यक्रम हामीले आफैं सञ्चालन गरेका छौँ भने केही संघ–संस्थाको सहकार्यमा सम्पन्न भइरहेका छन् ।”

बाख्रा उपहार पाएपछि स्थानीय समुदाय निकै उत्साहित देखिएका छन् । बस्तीकी मनकुमारी मिजारले आफ्नो परिवार वर्षौंदेखि चरम गरिबीमा जुँधिरहेको बताउँदै भनिन्,
“हामीलाई परिवार धान्न ज्याला–मजदुरी गर्नुपर्छ, छोराछोरी पढाउनसमेत कठिन छ । यस्तो अवस्थामा बाख्रा सहयोग पाउँदा साँच्चिकै ठूलो हौसला मिल्यो ।”

यस्तै, शोभा सार्कीले पनि बाख्रा कार्यक्रमले आफूहरूलाई थोरै भए पनि ठूलो राहत पुगेको बताइन् । उनका अनुसार,
“हाम्रो आर्थिक अवस्था निकै कमजोर छ । जीवनयापनमै समस्या थियो। यस्तो समयमा ली–बर्डले दिएको सहयोगले हामीलाई भविष्यप्रति आशा जगाएको छ ।”

यसरी बाख्रा उपहार कार्यक्रमले दलित समुदायका धेरै परिवारमा आयआर्जनको नयाँ अवसर सिर्जना गरिदिएको छ, जसले भविष्यमा उनीहरूको आर्थिक तथा सामाजिक स्थिति सुधारमा योगदान गर्ने अपेक्षा गरिएको छ ।