सुर्खेत । कर्णाली प्रदेश सरकारले बढ्दो घरेलु हिंसा, बालविवाह र बहुविवाह न्यूनीकरणका लागि ‘छोरी सशक्तीकरण कार्यक्रम’ ल्याएको छ। आर्थिक र सामाजिक रूपमा पछि परेका परिवारका छोरीहरूलाई लक्षित गरी यो कार्यक्रम सुरु गरिएको हो।
कार्यक्रम अन्तर्गत छोरीहरूलाई उच्च शिक्षा, सिप विकास, सचेतना र क्षमता अभिवृद्धि जस्ता क्षेत्रमा सहभागी गराइने छ। सामाजिक विकास मन्त्रालयका अनुसार यो वर्ष शिक्षा र सिप विकाससँग जोडेर कार्यक्रम कार्यान्वयन गरिँदैछ।
सामाजिक विकास महाशाखा प्रमुख सुवर्ण खड्काका अनुसार कार्यक्रममार्फत बालमैत्री, छाउपडीमुक्त, छुवाछुतमुक्त र बालविवाहमुक्त स्थानीय तह घोषणामा सहयोग पुर्याइनेछ। स्थानीय सरकारले चलाइरहेका अभियानलाई सबल बनाउन प्रदेश सरकारले पाँच करोड रुपैयाँ बजेट विनियोजन गरेको छ।
यसअघि पनि कर्णाली सरकारले ‘छोरीबुहारी छात्रवृत्ति कार्यक्रम’ सञ्चालन गरेको थियो, जसअन्तर्गत हालसम्म नौ सयभन्दा बढी महिलाले प्राविधिक शिक्षामा अध्ययनको अवसर पाएका छन्।
प्रतिक्रिया दिनुहोस्